O martes 25 de marzo entregáronse no auditorio do centro os premios da XXVIII edición do Premio San Clemente aos tres novelistas gañadores: na modalidade de lingua galega, a Antón Riveiro Coello pola novela Hotel Carioca, editada por Galaxia, en lingua castelá, a Alejandro Zambra por Literatura infantil, editada por Anagrama, e na modalidade de lingua estranxeira, a Maggie O´Farrel por El retrato de casada, publicada por Libros del Asteroide. O acto, presidido pola alumna Antía Blanco, en nome de todo o alumnado, contou coa presenza da Alcaldesa de Santiago, Goretti Sanmartín, e de membros da corporación municipal e tamén da Consellería de Educación, Ciencia, Universidades e Formación Profesional, que colabora co Premio: o Conselleiro Román Rodríguez, o Secretario Xeral Técnico Manuel Vila e o Director Xeral de Centros e Recursos Humanos Jesús Manuel Álvarez Bértolo, así coma o Secretario Xeral de Política Lingüística, Valentín García, da Consellería de Cultura, Lingua e Xuventude.

Pola mañá celebrouse unha rolda de prensa no Salón de Claustros na que participaron os tres escritores galardoados, a directora do instituto, Gemma Paredes, e o alumno Lois Docampo, representante do xurado, formado por un total de nove centros: o IES do Sar (Santiago de Compostela), o IES de Brión (Brión, A Coruña), o IES Aquis Celenis (Caldas de Reis, Pontevedra), o IES Gregorio Fernández (Sarria, Lugo), o IES Universidade Laboral (Ourense), o IES Ramiro de Maeztu (Madrid), o Lycée Saint François Xavier de Vannes (Francia), o Grimmelshausen Gymnasium de Gelnhausen (Alemaña), o Hockerill Anglo European College (Reino Unido) e o propio IES Rosalía de Castro.

Os tres escritores coincidiron en calificar o Premio San Clemente de “perfecto”, precisamente por ser outorgado por un xurado de rapaces novos “sen contaminar e sen prexuízos”. A novelista inglesa Maggie O´Farrel comentou que recibiu a noticia do premio “bastante nerviosa”, ao tratarse dun xurado adolescente, pero que agora se sente moi orgullosa, porque isto confirma a súa idea do marabillosa que é a xente nova: “Gústame saber que existe un premio que o que fai é escoitar as opinións das persoas novas. Normalemente os adolescentes teñen moi mala prensa. Dise que non lles interesa facer nada e eu sempre penso que son marabillosos e intelixentes”. Destacou tamén a importancia deste tipo de iniciativas que o que fan é incentivar aos mozos e mozas a “deixar de lado os teléfonos e pantallas”, ao tempo que denunciou que o obxectivo das “grandes corporacións é reconfigurar os nosos cerebros a través das pantallas”. O escritor chileno Alejandro Zambra comentou que cando escribe, polo xeral, non pensa nun público concreto, pero que estar hoxe co alumnado do noso instituto só pode dicir que sente un “entusiasmo” especial por “estar en contacto con lectores inesperados”. O escritor galego Antón Riveiro Coello manifestou estar “moi orgulloso” no só por recibir o premio, senón tamén por compartir “nómina” con O’Farrel e Zambra, dous autores dos que se sente literariamente moi cercano.

ENTREGA DE PREMIOS AOS ESCRITORES GAÑADORES

LINGUA GALEGA
Antón Riveiro Coello
Hotel Carioca

Hotel Carioca, de Antón Riveiro Coello (Xinzo de Limia, 1964) editado por Galaxia. En 1982, Helena ten 13 anos e os domingos lelle á avoa as cartas que envía o seu tío favorito, Leandro, que marchou ao Brasil para non volver. Un día chega a noticia de que Leandro morreu. A familia sospeita que foi asasinado e encárgalle unha complexa misión a Helena: manter a ficción de que Leandro segue con vida para que a avoa non saiba a verdade.

O xurado destacou no seu ditame “a maxistral construción” de Hotel Carioca para ensamblar “distintas tramas en distintas épocas” e a súa “variedade temática”, na que se abranguen asuntos universais como “a emigración, a familia, a homosexualidade”.

LINGUA CASTELÁ
Alajandro Zambra
Literatura infantil

Literatura infantil, de Alejandro Zambra (Santiago de Chile, 1975) editada por Anagrama. Diario de paternidade, carta ao fillo e ficción pura conviven en extraordinaria harmonía ao longo deste libro.

O xurado salientou a “universalidade temática”, a “sinxeleza da narración e o seu dinamismo”, así como tamén “a reflexión que achega sobre a educación e o sentimento de ser pai”.

LINGUA ESTRANXEIRA
Maggie O´Farrell
El retrato de casada

El retrato de casada, de Maggie O’Farrell (Coleraine, Irlanda do Norte, 1972) editado por Libros del Asteroide. Florencia, século XVI. Lucrezia, terceira filla de Cosimo de Medici, vese na obriga de casar co prometido da súa irmá falecida, Alfonso D’Este, primoxénito do duque de Ferrara. Trasládase a corte de Ferrara e o único que está claro para a protagonista é o que se espera dela: que proporcione axiña un herdeiro ao título.

Sobre esta obra, o xurado salientou a conxugación de “dúas liñas emerxentes”, a “linguaxe poética empregada”, a ambientación histórica e “o fincapé” que se fai sobre un asunto esencial na vida: “a procura da liberdade”.

A XXVIII edición do Premio San Clemente nos medios

GALERÍA DE IMAXES DO XXVIII PREMIO SAN CLEMENTE